All Pakistani Dramas Lists
Latest Episodes of Dramas - Latest Politics Shows - Latest Politics Discussions

View RSS Feed

nayyabktk

humeiN pathar bana dena

Rating: 2 votes, 5.00 average.
      
   
Yehii gar zid tumhaari hey
chalo hum bhool jaatey heiN..!
sabhi waadey, sabhi qasmeiN
mohabbat ki sabhi rasmeiN
nahi, manzoor jo tum ko
kareiN ranjoor jo tum ko
tumhaari shaad-maani hi, azeez-az-jaan hey jab tou
tumheiN phir tokna kaesa?
ziyaaN, sood ki baabat, bhala phir sochna kaesa
chalo hum bhool jaatey heiN..!
mohabbat ki riyazat meiN
wafaaoN ki musaafat meiN
qadam kis ke kahaan behkey,huwi kis sey kahaan larzish
basaa di jis ney ik pal meiN,humaari aankhoN meiN baarish
ke jis ki tez boondoN ney
kisi tezaab ki soorat
nishaaN-e-manzil-e-dil hi, jala dala miTa daala
magar jaaNa
kahaaN aasan hota hey?
jigar ka khoon ashkoN meiN, badalna aur bahaa dena
khas-o-khashaak chun chun kar
gharonda ik banana aur…ussi ko phir jala dena
jawaaN sapnoN ki laashoN ko
darooN-e-jaaN chuhpaa kar…muskara dena
khizaaeiN paalna khud meiN, bahaareiN baanTtey phirna
kahaaN aasaan hota hey..?
buhat mumkin hey hum bhi haar hi jaaeiN
jawaaN hey zabt jo ab tak
muqaabil ghum ke aaey..aur Dhai jaaey
aur iss meiN bhii taa’ajub kiyaa?
tumhaarey louT aaney ki..bachi ho aas jo koi
nawaaey be-zubaaN ban kar
sisak kar phir sey utthey aur..tum tak bhi puhanch jaaey
so tum sey ye guzaarish hey
tab ik ehsaan tum karna
palaT kar dekhna yuuN sard nazroN sey
ke jo bhii aas zinda ho..
ussey yak-sar miTa dena
humeiN pathar bana dena


ABDUL NASIR NAYYAB
[email]NAYYAB_KTK23@YAHOO.COM[/email]
03139003346
03129332701
03456757117
Categories
Uncategorized

Comments

Log in